الخميس، 12 مارس 2009

الجواز وسنينه كلمات أمين الديب

البت باتعه .. بنت زيد عبد الصبور
اللي أمها يوم عرسهاكان عفشها .. حلّة وبابور
ومعاه كمان صندوق خشب
كان أصله سحارة صابون
فيه بنستين والمكحلة
ومراية والفلاية والملقاط
وحجر
وليفة ومبخره
وقزازة كان فيها البخور
وجوز صحون ومنٍخُلين
..والطشت والقروانه والغربال
..ومقشّه ليف ...ومقشتين عرجون
زيروزلعة وقلتين وماجور
وحصيره من سوق التلات
ولحاف بإيدها منجداه
ومخدتين والوش كان دمُّور
في الانفتاح
علي رأي صاحبي
والانبطاح
وفتحنا مصر سداح مداح
ونسينا حي علي الكفاح
والشعب محكوم بالسلاح
اتلخبطت كل الأمور
وقيم كتير
وعادات كتير اتغيرت
من ضمنها غًلو المهور
البنت دي
بنت أم باتعه مش عاجبه حد في مشيها
إكمنًّها .
. مشيت طريقها لوحدهاوالأسرة
غابت عنًّها
مشغولة عنها بعبئها
سايبينها هيًّ وشأنها
وإكمنًّها مستهدفه
الأجنبي ومعاه غبي فكّر لها
قال أولا
:ترفض معيشة أهلها
ترفض أوامر ربها
ترمي الحياء والانتماء ورا ضهرها
تقطع جدورها بنفسها
أوعز لها
إزاي حتعرض لحمها
وتبان مفاتن جسمهامن ضفرها .. لأعلي خصله ف شعرها
عمل الصالات .. تعرض موضات
والاعلانات .. ماليه الشاشات
بالشنبوهات والتسريحات
وحاجات كتير فرحت بها
تاهت ونسيت نفسها
وتكلًّمك ربع الكلام بالأجنبي
وتقول هالو ..
.بنت أم باتعه تقول هالو
مرسيه يا شوشو وثانك يوو
لكَمٍ يا توتو وياللا جو
وكبار شيوخ المسلمين ما عرفش ليه مًتلجًّمين
والمسئولين... فتحوا الببان علي وًسعها
قام قال سلامة ألمًّها
يمكن تغيّر فكرها
ترجع لدينها و ربهاوتعيش حياتها بحلوها و بمرها
راح لـ أمها ..
.يخطبها منها وقال لهابصراحه بنتك ..
عاوزه حد يلمّها
وأنا قدّها
قالت : وماله
البنت يلزمها الجواز
شخشخ جيوبك .. واشتري ياللا الجهاز
قال : اطلبي ...
قالت : تجهز شقه .. قد أربع إوض
أحسن نابوليا في البلد
وتجيبها من دمياط
وتجيب نجف من غير عدد
والمكنسة بشفاط
والدِش قبل الدٌش
والفيديو والبوتاجاز
وتجيب لها تلاجة ستاشر قدم
وتجيب لها قبل الجواز ...
الفرو والمحمول
وتجيب لها غسالة فول
لأنا قصدي فول توماتيك
شقتها كاملة ..زي أي بوتيك
وتجيب لها قبل الجهاز
الشبكة طقم من الدهب
أنا مش حاقولك ألماظ
وتجيب لها فستان زفاف
من غير كمام من غير كتاف
علشان يبين صدرها
وتبان مفاتن جسمها
وتجيب غوازي تزفها
واللي اسمه إيه شهر العسل
في الشرم واللا الغردقة
وبلاش أمور البعزقة
آدي مطلبي
إن كنت قادر مهره
اقرَّب لها
أنا مش حاميّل بختها ..
قال : يا ام باتعه حاجيب منين
أنا لاني راجل مرتشي
ولا أحب أجيب بالدّين
ولا أرضي بالتقسيط .
.الطاق بيبقي طاقين
ويكتّبوني شيكات
أو أمضي علي ايصالات
علي إنها امانات
وحكاية مش هيّ
لو بس فات شهرين
مادفعتلوش قسط
ينبدل المحامي اتنين
حايجيب له رفض الشيك
ومصيبه وقضيه
ومش حاقولك عالقرف
وحاجات مخلًّه بالشرف
اما البوليس والمحكمه
حابقي ف نظرهم منحرف
وباكسر القوانين
شوفي يا ام باتعه
أنا عندي شقه محندقه
معقوله ماهش ضيقه
فيها يادوب أوضتين
وعملت جمعيه
مع ناس أماره زيكم
وقبضتها ألفين
وادي اللي عندي وقلتلك بصراحه
وبإذن واحد أحد
ربًّك حايفرجها ..
وباتعه حتريَّحك .. وتعيش مرتاحه
قالت له: قم من هنا
قم فضها سيره
أنا احترمتك .. عشان الأهل والجيره
بتقولي الفين جنيه ؟!!
وانا اللي قال بافتكر ..باتعه حاتخد بيه
حافظ علي كلمتك يا اهبل ..
وخلًّيك زوق
دي باتعه طول عمرهادايما تبص لفوق
لاحمر ولاخضر
وشي محزَّق وبنطلونات
والشعر فوق كتفها سايح
وفي الكوافير
مش كل طير يندبح
خد دش وانت تفوق
وتفوق لنفسك
وتتكلم كلام موزون
وفرضنا انت اللي عاقل
والمستمع مجنون !
ألفين جنيه للغوازي واللا للمأذون ؟!!
فيه ناس كتير زيكم مش عايشة في الدنيا.
مابتسمعوش الرداوي .. واللا تلفزيون ؟!!
شفت اللي بيقدمه الحاج متولي ؟!!
الشقه بالعفش كامله..
وفلوس كتير في البنك
كتبه لعروسته ..
دَا غير اللبس والمصاريف
شايفاه بعيني
ولا واحد غريب قاللى
كل المسلسل تابعته دقيقه بدقيقه
هوالحاج متولي إلاهي لم يشوف ضيقه
راجل صحيح مًقٍتًدًر
كل البنات عاوزاه
وباتعه بنتي ..إلاهي يكون نصيبها معاه
مش جاي تقولي الشباب !!
أنا ناقصه هَمٍ تقيل
قال : يا ام باتعه اسمعيني
كل دا تمثيل
قالت له: ده قصر ديل
وبلاش كلام فاضي
الشعب راضي
مافيش غيرك عامل لي تقيل
ما تكونش ماهر يا شاطر
واسم أبوك عطار
والشاي علي النار
وقاعد لسَّه عالرمله
والحلوه تيجي تلاقيك
فارش لها المنديل !!
قال : يا ام باتعه
دي ناس بتوزع الأوهام
ساعدوا العدو بجهلهم
في الحرب عالإسلام
وأنا مش بالوم جهلهم
اللوم علي الإعلام
قالت : خلاصة الكلام
أنا بنتي مش من وقمكم
شوفولكو ناس علي قدًّكم
أنا بنتي حلوه مثقفه
حافظه الأغاني كلها.
أحدث شرايط عندها.
دي لما تلبس بنطلونها الجينز
كل الشباب تجري وتخطب ودّها
ونانسي عَجرم نفسها
ما تجيش في خصله ف شعرها
ولا تيجي ضفر ف رجلها
طب والنبي ...لو شافها واحد أجنبي
ليجيب لها.كل اللي ييجي ف نفسها .
*******شعر: أمين الديب

هناك 14 تعليقًا:

صبرني يارب يقول...

الله بجد جميل اوي

بجد كتير معبر عن الوضع الحقيقى وكمان دمه خفيفه ومكتوب حلو اوي

ولو انى ما افهمش فى الشعر لكن عجبني وشدني وقريته كله واستمتعت به فعلا

تحياتي لحضرتك

*البت المشمشية *حلوة بس شقية * يقول...

بجد يعنى والله والله جميلة جداااااا
الراجل دة بجد عقبرى
كلامو جميل جداااااا
وبيرسم الواقع اللى احنا فيه فى كلمات بجد حلوة اوى
انا قريتو كلو
ان ده بقه حال البنات
بس اكيد مش كلهم
والاهل
اللى بيغالو فى الطلبات
مش عايزين بنتهم تتعب فى حاجة
ولا تشيل مسئولية
يلا
مبقتش تفرق سينا من سونيا

همس الاحباب يقول...

عبقرية فى الكلمات والمعانى
بجد صور حالنا بكل سلاسة واتقان
تسلم اختياراتك بجد
تحياتى

حاسوباتيه يقول...

كلام جميل قوي تسلم ايدك

mohamed يقول...

صبرنى يارب
===========
البت المشمشيه والى هى حلوه من غير مشوفها بس أكيد هى شقيه
================================
همس الاحباب
===========
حاسوبتيه
==========
طبعا مش كل البنات كده , بس أكيد
حتى البنات العاديين بتعرضوا لضغوط
من المجتمع ومن الاقارب ومن داخل أحيانا أنفسهم للاهتمام بالماده بصفه اولى
مثلا ممكن تكون الام دائما تقول ده حرام وده حلال ولكن عند جواز بنتها تقول الى معاه قرش يساوى قرش وتنسى حديث الرسول عليه الصلاة والسلام
أن آتاكم من ترضون دينه وخلقه فزوجوه ولو بخاتم من حديد
ملحوظه من رأيى ان المقصود بالخلاق ليس فقط العبادات ولكن بالسلوك الصحيح المتفق مع قلب الدين مثل العدل وآعطأ كل زى حق حقه وليس التلاعب بالحقوق و الافتئات على الغير

لكم جميعا تحياتى

GiGi world يقول...

الله بجد روعه جدااااااااااااااااااا
تسلم اي اللى كتبها
وتسلم ايد حضرتك انك نقلتها

maha zein يقول...

الله
حلو حلو حلو اوي
الا شوية الوصف اللى فوق بتوع وابور الجاز والمكحلة والمقشة البلح
الله
بيحاكي الواقع بأسلوب جميل جدا

دي جبتها منين دي
في كتاب ولا ايه
تحفة جدا
تسلم ايدك يا عمو يا عمو
دي عاملة ذي قصة تشوقك تعرف اخرتها
وفي النهاية نقول ان فعلا في ستات والله كده
وده عاتشي
عاتشي جدا

حضرتك عامل ايه
يا رب تكون بخير

أختكم فى الله يقول...

جميلة فعلا

جزاك الله خيرا على نقلها

Unknown يقول...

دى ملحمة مش قصيدة
بمعنى انها بتحكى قصة
حالنا ومحتالنا من
زماااااااااان للان
للاسف بلدنا تغيرت كتير
للاسوء فى اشياء كتير
ربنا يرحمنا ويستر من القادم:(

Soul.o0o.Whisper يقول...

السلام عليكم و رحمة الله

عمو محمد /
بأعتذر على التأخير
بجد غصب عنى

بجد القصيدة رائعة جدا
و صورت واقع مؤلم باسلوب سهل

صحيح الغلا بئا فى كل الامور
و ان ماكنش من الشئ واحد و اتنين يبئا بلاش
لكن ....
صدقنى يا عمو محمد ...
ماعدتش ينفع المهر اللى باتعة اتجوزت بيه فى الزمن دا

بغض النظر عن ان البنت بتغالى
بس الشاب نفسه بيفهم دا غلط .. بيقول اهلها بايعنها
دى نقطة

كمان الشاب بيضغط على النقطة دى اوى
و تيجى تشوفه مش قادر على انه يفتح بيت و يقولك ربنا هيفرجها
هو صحيح الرزق بايد ربنا
بس الرسول قال من استتطاع منكم الباءة
يعنى مش يبئا مش قادر و يقول ربنا هيفرجها
لا .. اجتهد و اشتغل و لما تقدر ماشى

صحيح يمكن القصيدة عن المغالاة اللى مالهاش لازمة

لكن صدقنى الفكر اللى بئا سايد الوقتى بين الناس كلها كبار و شباب
بيفرض عليك دا



بجد بأشكر حضرتك على البوست دا
و مرة تانية آسفة على التأخير



خالص ودى

بـِصَمتـِـ أميرة ــــى يقول...

حلو اوى اوى الزجل ده
بجد روعة التعبير عن حال شوية بنات وامهاتهم - واقع ملموس -- عجبتنى جدا

بس يامحمدخلى عندك امل --فيه بنات كويسين- لسه مصر بخير يامحسن بيك- ههههههه

تقبل مرورى
ملكة بحجابى

أحمد الصعيدي يقول...

السلام عليكم أخي الكريم
موضوع جميل بيعكس بساطة الحياة المصرية لكن فين كان زمان
لك كل الشكر

أود أن ألفت نظر حضرتك أن تغير التعريف الخاص بمدونتك لأن الحق والعدل من أسماء الله عز وجل وسبحانه

لك الشكر أخي العزيز
السلام عليكم

الرسم بالكلمات

maha zein يقول...

تعليقاتك الاخيرة بجد تحفة
تنفع بوستات لوحدها
طب انا اقول عوزين تعويض انتوا المفروض تهدوني
ينفع كده تشعللها في دماغي يا عم محمد

يعني ينفع
اروح انا دلوقتي الم ناس ونطلع علي الغردقة نولعها
هه
ساعتها بقه هتقول ولا اعرفها
صح
ماشي ماشي

dina يقول...

لا اللى كاتب الكلام دا بجد اكتر من عبقرى....تناول المشكلة من كل جوانبها و مسابش فيها حاجة و بجد شكرا انك خليتنا نقرا الكلام الجميل دا

ماهى فعلا مشكلة...كل واحد عاوز اللى ييجى لبنته دا ييجى يعيشها فى نفس المستوى اللى هو عايش فيه مع انه هو نفسه وصل للمستوى دا بعد مثلا 20 ولا 30 سنة و اول ما بدأ حياته مابدأش كدا و بيطالب واحد لسا فى بداية حياته انه يكمل مسيرة بدأها هو من 30 سنة...طب ازاى
بجد الاهالى لازم تيسر ..و زى ما قال رسولنا الكريم صلى الله عليه و سلم فيما معناه اذا جاءكم من ترضون دينه و خلقه فزوجوه...دلوقتى للاسف بيزحلقوه على طول