الخميس، 14 أغسطس 2008

معاش لله يا محسنين

جالس فى آمان الله لابية ولا عليا وأذا بالسيدة منى مقدمة برنامج العاشرة مساءا


تستضيف الاخ البدرى فرغلى عضو مجلس الشعب سابقا , وحاليا على المعاش من


الوظيفة وكمان من المجلس ,يعنى بأختصار أصبح سيادتة من أرباب المعاشات بجدارة


ماااااااااااااااااااااا علينا؟؟؟؟؟؟؟


ولهذا الرجل أكن أحترام خاص, طب أسألونى لية, أجوبكم من غير لف ولا دوران


لأنة صادق فى التعبير عن مشاعر ومطالب الناس


والصدق لايحتاج لشهادة من جامعة كمبردج ولامن جامعة أكسفورد ولا يحتاج لبدلة


من أرقى بيوت الازياء, ولا ارصدة فى البنوك المحلية ولا الدولية , ولا للغة بليغة وأستخدام


مفردات(كلمات) منمقة ولا تعبيرات أنجليزيةأو حتى فرنسية ولا مجمع اللغة العربية


فقط الصدق والاحساس و فهم ما هو المطلوب وما يجب أن يكون.


نعود لحوار عمنا البدرى فرغلى وهو من بورسعيد لمن لا يعلم ,سيادتة كان عايز يقول أية!


الرجل عندما خرج على المعاش وجد أن دخلة أنخفض الى سبع ما كان يتقاضاة أثناء عملة


لو الحكاية مش واضحة نقول كمان, لو البدرى كان بيقبض 700 جنية مثلا أثناء عملة


يبقى على المعاش ياخد 100 جنية مثلا على وجة التوضيح, وطبعا مفيش حوافز


ولامكافئات عادية ولا غير عادية ولا لجان و لامقابل أنعقاد مجلس الادارة ولا أنفضاض


أنعقاد مجلس الادارة , المعاش وبس فقط لاغير


الدولة كل سنة بتضيف علاوة أجتماعية للموظفين وأً صحاب المعاشات مثلا السنة دى


أعطوا الموظفين 30% طب أعطوا لأصحاب المعاشات كام 20% أو أقل السؤال هنا


لية أقل,الناس أصحاب المعاشات خدموا الوطن لمدة لاتقل عن 36 سنة أو ازيد أو أقل


وهم أبى وجدى وأخى وأختى وسنهم قد كبر وصحتهم تحتاج الى العلاج والكل يعلم كم يكلف


ولا على رأى البدرى فرغلى نوزع عليهم أكفان وكفاية عليهم ولا اية


سؤال تانى فلوس المعاشات320 مليار جنية هل من حق أى حكومة تتصرف فيهم


كما تريد,ولما تحب تأخد فلوس المعاشات مش تستأذن من أصحاب المعاشات


وكمان تحسب فائدة على الفلوس 4% فقط , طب لما حد بيتأخر فى سداد للحكومة بيأخذوا


منة فائدة كام


عموما عم البدرى الفرغلى بأعتبارة نقابى قديم طلعت فى دماغة و هو جالس على القهوة


يعمل أتحاد لاصحاب المعاشات, والراجل مجرد ما أقترح نزلت علية الالف من التوكيلات



وباين أن عم البدرى فرغلى ناوى يعمل صداع للحكومة


سلامتك ياااااااااااااااااا حكومة

هناك 9 تعليقات:

noha يقول...

والله يا عمو اللى يعيش ياما يشوف

بجد انا اكتشفت ان بلدنا دى بلد المتناقضات

عجايب الدنيا مش سبعة بس على فكرة
وسلامتك يا حكومة

norahaty يقول...

السلام عليكم ورحمة الله وبركاته
كتير الكلام عن المعاش والمعاشات
والحكومة عاملة ودن من طين وودن من عجين
زى فى كتير من الامور ,المهم اقولك ان كلام الراجل مضبوط بالنسبة (لعّليه القوم من الموظفين )اصحاب حضور اللجان وبدلات التمثيل وما شابهه لكن الموظفين امثالى العادين اللى مالهمش الا الماهيه والحوافز اينعم المعاش حيقل بس مش بنفس النسبة الفظيعة دى لكن ممكن للنص او التلت عارفة انها برضه مشكله بس اقولك ماهو مفروض الطلبات بتقل لكن ازاى والابن او البنت بتفضل مربوطة فى ذمتك لسن التلاتين يمكن او اكتر .عارف انا فكرت فى بعض اللحظات فى حكاية المعاش المبكر لظروف خاصة بى لكن جت لى مريضة وكان الوقت سامح انه تحكى معايا شوية وحكتلى عن المعاش واد ايه المشاكل (النفسية بتاعته)اللى هى اكتر يمكن من المشاكل الماديه عارف زى ما بقولك خلتنى شيلت الفكرة دى من دماغى نهائى .
واهلا بالمعاش حينما يحين وقته,ولا داعى لاستعجاله.
سعدت بتشريفك لمدونتى وللتعرف بك
مع تحياتى.

norahaty يقول...

السلام عليكم ورحمة الله وبركاته
حبيت اقولك معلش نصيحة
شيل التأكيد على الكلمة من التعليق
1-الاعدادات
1-التعليقات
3-التاكيد على الكلمة شيل علامة الصح اللى فى المربع اللى امامها
4-احفظ التغيرات
وتقبل تحياتى مرة اخرى

بنت سيناء يقول...

صحيح كلامك..بس المعاشات بتختلف حسب الوظائف..يعنى انا اعرف واحد طالع معاش على مدير عام وبياخد فوق الالف جنية وفى المقابل واحد كان رئيس للشئون المالية فى مجلس مدينتة وتوفى وترك اسرة من عشر افراد ..لدولة بتصرف لة 600 جنية..يعملو اية فى العصر الذهبى دة؟؟لاوجة للمقارنة بين الموظفين الغلابة واعضاء مجلس الشعب..

mohamed يقول...

أبنتى الغالية نها حتة السكر
بأعتبار حضرتك صيدلانية
يعنى التحليل الكيماوى
جزء هام فى ثقافتك العملية
فأنا برجوكى أنك دائما السؤال التالى

لماذا ياهذا؟
لابد نحاول نفهم ولا نقبل كل ما يقال لنا بدون فهم ,فقد خلق الله تعالى لنا عقل ولابد من أستخدامة
منتظرك فى مدونتى الاخرى
مشاعر وأفكار

http://kalamfekalamm.blogspot.com/

شرفتينى أبنتى

mohamed يقول...

norahaty
أهلا بيكى دائما

أولا نصيحتك تم تنفيذها

ثانيا طلبات المحال على المعاش لاتقل
بل تزيد لان هو الان لايعيل اسرة واحدة بل يعيل ابن وابنة لم يتزوجوا
او تزوجوا ويحتاجوا المساعدة
وايضا الدواء والعلاج التى اصبحت اسعارة فلكية


أنا الذى تشرفت بيكى
على فكرة


مدونتك ومدونة نها
تجدى الينك الخاص بهما فى أخر مدونتى

mohamed يقول...

بنت سيناء ارض الشهداءوالابطال
طالما هناك فسدة وفاسدين فكما يرتبوا أمورهم فى أشياء وهم فى وظائفهم
فهم أيضا يرتبوا أمورهم لبعد المعاش
فبخلاف ان الاجر المتغير عندهم كبير وفق ما يتقاضوة بصفة رسمية
وبالتالى يكون معاشهم كبير
مع تحياتى للعصر الذهبى
وكلمة العصر غير مقصود بها الزمن
بل مقصود بها عملية العصر كما نعصر الليمون

شرفتينى يا بنت الارض الطاهرة

appy يقول...

انت بتتكلم عن الحكومه طيب عيب عيب بقى
احنا اصلا معندناش الكلام ده عندنا بس العزبه ومالكيها هههههههههه

mohamed يقول...

ماكنت واخد بالى أنى بكلم أساسا
عن الحكومة, بس هيا حكومة مين أنا كل ألى أعرفة عنهم أن دول بيعطلوا المواصلات لما يمشوا فى الشارع ولما بيمضوا قرار بيعكننوا الناس
ولما بيعكننوا الناس هما بيقوا مبسوطين,
ولما بنبسطوا بينشكحوا من نفسهم وبيهنوا نفسهم وينشروا تهنئة لانفسهم
والصحف تسترزق ويقولوا عليهم عباقرة
وسلامات يااااااااااااااحكومة